Nel primer artículu tocante a les series coreanes falamos de Mr. Sunshine, un drama históricu perinteresante que siguimos camentando que veáis. El xéneru históricu presta-yos enforma nos doramas, pero si hai otra temática que ta espoxigando d’una montonera de formes son los zombies. Sí, pue paecer qu’en Corea tienen dalgún tipu de filia con usar esti tema, pero la verdá ye que tán sacando mui bon material nos caberos años.
Güei vamos de falar de Kingdom, una serie que podéis atopar en Netflix y que tien yá dos temporaes (qu’en total sumen doce capítulos) y una película (anterior a los fechos que se cunten na serie). Kingdom ye una producción perambiciosa que combina l’ambientación histórica colos zombies: sí, la serie va de zombies y amás ta ambientada na dinastía Joseon (que duró cinco sieglos, ente’l sieglu XIV y el XIX).
Un argumentu distintu
¿L’argumentu? El rei ta enfermu y naide lu pue visitar, y nesi intre hai una conxura nel palaciu p’acusar de traición al príncipe herederu Yi Chang (d’un matrimoniu anterior) pa nun reine y lo faiga’l fíu que va tener la reina actual.
Esta enfermedá del rei fai que’l príncipe fuxa col so guardasespaldes Moo-Yung del palaciu a investigar qué ye y casualidaes de la vida, atopa’l sanatoriu d’ónde vieno el médicu que lu curó y nesi momentu la xente entama a alloriar y convertise en zombies. Ye ehí onde conoz a los que podemos considerar los otros dos protagonistes principales de la serie: la enfermera Seo-Bi(interpretada,por cierto, Bae Doona, que tamién protagoniza Mar de tranquilidá) y el soldáu desertor Yeong-shin.
El grupu va siguir les pistes que van atopando al empar que paez qu’esa “plaga” va enfermando a cada vez más persones. Van decatándose que son irracionales y que si te ñasquen yá nun tienes salvación y vas convertite nún, y tamién que too lo que ta pasando ta venceyao ente sí (pero nun queremos cuntavos tola serie).
Kingdom nun ye la típica serie de zombies, porque magar que ye una serie d’época, la serie tenta de dar una esplicación racional a lo que ta pasando, y amás dende’l puntu de vista de la medicina d’esa dómina.
Los efectos, de primer nivel
No tocante al apartáu d’efectos, ambientación y vestuarios ye una serie ablucante visualmente, que xuega colos planos y les illuminaciones y los escenarios pa crear entá más tensión no que ta pasando. Amás, atopamos unos zombies mui realistes, con una carauterización y una actuación perbona, inclusive cuando la enfermedá los tresforma y dexen de ser humanos.
Como yá diximos al entamu del artículu, a los coreanos gusten-yos los zombies y esti nun ye l’únicu títulu que podéis atopar con esta temática: tamién podéis atopar la saga de películes formada por Tren a Busan (protagonizada por Gong Yo, que de xuru que vos suena de Squid Game y tamién de Mar de tranquilidá), Vivu y Península. Toes tan ambientaes na actualidá y falen d’una epidemia zombie en Corea y cómo la xente tien que fuxir a los campos militares d’emerxencia. Amás, ta previsto que s’asoleye esti añu Estamos vivos, esta vez ambientada nun institutu y tamién de supervivencia con toques cómicos.
