Nos últimos tiempos rúxese muncho al respeutive de les imáxenes y los testos creaos per aciu d’intelixencies artificiales, aldericándose, dacuando con bastante belixerancia, sobre si ye ético usar estos productos ellaboraos por programes que tienen deprendío usando lo fecho por artistes de carne y güesu y, en resultancia, con drechos d’autor. Hai quien defende que ye una ferramienta más a la qu’hai que facese, y se se basen neses imáxenes como lo fadría otru autor humanu cualesquiera. Hai tamién quien considera que ye usar el trabayu de los autores escontra ellos, porque ye muncho más barato escribir unes pallabres (anque seya nun programa de pagu) pa qu’un códigu te dibuxe la portada o’l cartelu.
Nosotros, dende Refuelgu!, nun pretendemos entrar nesti alderique, pero sí mostrar qu’hai esperimentos que pelo menos resulten llamaderos, como son los qu’asoleyen los últimos díes nes redes “encarnando” les comunidaes autónomes en persones. Nel primeru “pidióse” a la intelixencia artificial Midjourney convertir les distintes comunidaes autónomes en persones (tenéis, si vos llama, l’enllaz d’Instagram equí). Nel segundu (equí tenemos el filu de Twitter) convertiles en villanu de cómic. Por supuestu, la seleición d’imáxenes na que se basa nun dexa de ser en gran parte aleatoria, lo que significa que probando más vegaes puen salir coses mui distintes. Por embargu, dexámosvos colos resultaos p’Asturies, que de xuru que son los que más vos interesen:
